Зээлийн батлан даалтын сан болон Капитрон банкны дэмжлэгээр бизнес эрхлэгч 20 эмэгтэй франчайз бизнесээ эхлүүллээ
Зээлийн батлан даалтын сан нь Капитрон банк болон CU конвиниенс дэлгүүртэй хамтран бизнесийн салбар дахь эмэгтэйчүүдийн оролцоог дэмжих, жижиглэн худалдааны салбарт эмэгтэйчүүдийн өрсөлдөх чадварыг нэмэгдүүлэх зорилгоор 2023 оны 5-р сард хамтын ажиллагаа эхлүүлсэн. Энэхүү хамтын ажиллагааны хүрээнд бизнес эрхлэгч эмэгтэйчүүдийг бизнес эрхлэхэд шаардлагатай санхүүгийн дэмжлэг болон эх үүсвэрээр хангах замаар чадавхжуулах явдал юм. Эмэгтэй бизнес эрхлэгчдэд тулгардаг хамгийн том бэрхшээл нь бизнесийн анхны хөрөнгө оруулалт, тэр дундаа барьцаа хөрөнгийн дутагдал байдаг. Тэгвэл уг хүндрэлийг шийдэхээр Зээлийн батлан даалтын сан нь Капитрон банк, Премиум Нексус ХК-тай хамтран CU конвиниенс дэлгүүрийн франчайз эрхийг хөнгөлөлттэй, батлан даалттай зээлээр авах нөхцөлийг бий болгосон. Уг батлан даалттай зээлийн хүрээнд өнгөрсөн 1 жилийн хугацаанд 20 бизнес эрхлэгч эмэгтэйд 2 тэрбум төгрөгийн хөнгөлөлттэй, батлан даалттай зээл олгоод байна. Зээлдэгч жилийн 8.88%-ийн хүүтэй 100 сая хүртэлх төгрөгийн хөнгөлөлттэй зээлээр CU конвиниенс дэлгүүрийн франчайз эрх эзэмшигч болох боломжтой. Энэхүү зээл нь хамгийн богино хугацаанд хувийн бизнесээ эхлүүлэх боломжийг эмэгтэй бизнес эрхлэгчдэд олгохоос гадна бизнесийн салбар дахь эмэгтэйчүүдийн оролцоог нэмэгдүүлэх замаар жендерийн тэгш байдлыг хангахад чиглэсэн томоохон алхам болсон юм.
CU ФРАНЧАЙЗ ДЭЛГҮҮРҮҮДЭЭ ХҮЛЭЭЛГЭН ӨГСӨӨР БАЙНА
CU брэндийн мастер франчайз эрх эзэмшигч "Сэнтрал Экспресс Си Ви Эс" ХК нь энэ оны 3-р сараас эхлэн хувийн бизнестэй болох хүсэлтэй иргэд болон бизнесийн цар хүрээгээ тэлэх сонирхолтой жижиг дунд бизнес эрхлэгчдэд зориулсан CU Франчайз хөтөлбөрөө дахин эхлүүлсэн билээ. Уг хөтөлбөрийн хүрээнд CU сүлжээ дэлгүүрүүдээс борлуулалт нь тогтворжиж, хэрэглэгчид танигдсан байршлуудыг сонгон авч өөрийн бизнестэй болох боломжийг нээснээс хойш CU франчайз эрх эзэмшигчдийн тоо өдрөөс өдөрт өссөөр байна.